Tabata na November 1954 mientras cu Pastor Hendriksen ainda tabata riba e isla, ora cu Pastor R. E. Gibson i famia a bini for di Bahamas pa traha den e Mision na Curacao i a predica su prome sermon titula "Kico bo ta pensa di Cristo?" dia 20 November 1954 na Iglesia Mundo Nobo. (Curacao)

Pronto despues di nan jegada, Pastor Gibson a crea un spirito di reavivamento den tur e iglesianan i lidernan den henter Mision. Despues el a bin Aruba pa dedica e Iglesia nobo di San Nicolas i crea un movemento di reavivamento, nan a cuminsa dia 26 di februari i a kaba dia 6 di maart 1955. Pastor Hendriksen a informa: "E dedicacion di e Iglesia nobo di San Nicolas, Aruba, tabata e climax di e reunionan di reavivamento den henter Antias Hulandes.

E ta e iglesia di mas nobo i mas grandi di e Stat. Bou di liderasgo di Pastor R. A. Hamm, e rumannan a juda cu e construccion di e iglesia dor di nan propio sacrifisio i nan manera efisiente di traha. 

E prome minister a asisti na e dedicacion di e Iglesia. E la felicita nos hendenan pa loke nan a hasi i a expresa e apresacion di e gobierno pa cu e actividatnan di benevolencia cu e iglesia tabata eherse. E Director di Relacion Publico di Refeneria Lago (e refeneria mas grandi di Mundo) tambe tabata presente. E tabata esun cu a zorg pa e iglesia haña un orgel electronico for di su compania.

Pastor Fernon Retzer a predica e sermon di dedicacion. Despues di e servisio di dedicacion a continua un siman di reavivamento. Pastor Retzer tabata ministra devocionalnan den e oranan tempran di mainta. Durante sesionnan di e dia metodonan di enseñansa pa ganansia di alma tabata ser duna. Pastor Reile, Baasch, McNeil, Berkel i Henricksen tabata guia e servisio Evangelistico di anochi.

(Legado di Fe, p. 95-96)